თავი 4. საზოგადოების წინააღმდეგ მიმართული დანაშაული

მუხლი 4.1 — სროლა საზოგადოებრივ ადგილებში

საზოგადოებრივი თავშეყრის ადგილებში სროლა ისჯება 20 თვით თავისუფლების აღკვეთით.

გამონაკლისი: აღნიშნული მუხლი არ ვრცელდება:

1. მოქალაქეზე, რომელიც მოქმედებს აუცილებელი თავდაცვის ფარგლებში;

2. სახელმწიფო მოხელეზე, რომელიც უფლებამოსილების ფარგლებში ახორციელებს პირის დაკავებას;

3. შემთხვევაზე, როდესაც სროლა აუცილებელია მოქალაქის სიცოცხლის ან ჯანმრთელობის დასაცავად;

4. შემთხვევაზე, როდესაც საფრთხე უშუალოდ ემუქრება სახელმწიფო მოხელის სიცოცხლეს.

მუხლი 4.2 — პირადობის დამალვა

უცხო ქვეყნის მოქალაქისთვის აკრძალულია სახელმწიფოს ტერიტორიაზე სახის განზრახ დამალვა ნიღბის ან სხვა საშუალების გამოყენებით, თუ ამის კანონიერი საფუძველი არ არსებობს.

აღნიშნული ქმედება ისჯება 40 თვით თავისუფლების აღკვეთით.

მუხლი 4.3 — საზოგადოებრივი წესრიგის დარღვევა

პუნქტი 1. ხულიგნობა

საზოგადოებრივი წესრიგის უხეში დარღვევა, რომელიც გამოხატავს საზოგადოების მიმართ აშკარა უპატივცემულობას, ისჯება 10 თვით თავისუფლების აღკვეთით.

პუნქტი 2. სახელმწიფო ტერიტორიაზე უნებართვოდ ყოფნა

აკრძალულია მთავრობის შენობაში, მერიაში, შერიფის განყოფილებაში ან სხვა სახელმწიფო დაწესებულებასა და მის კუთვნილ ტერიტორიაზე ყოფნა კანონის წარმომადგენლის ნებართვის გარეშე.

პირველი დარღვევის შემთხვევაში პირს ეძლევა გაფრთხილება.

განმეორებითი დარღვევა ისჯება 10 თვით თავისუფლების აღკვეთით.

პუნქტი 3. საფლავების შელახვა

საფლავის, სასაფლაოს ან დაკრძალვის ადგილის შელახვა ისჯება 10 თვით თავისუფლების აღკვეთით.

პუნქტი 4. ქალაქის სახურავებზე უნებართვოდ ყოფნა

ქალაქის შენობების სახურავებზე უნებართვოდ ყოფნა ისჯება 10 თვით თავისუფლების აღკვეთით.

გამონაკლისი: აღნიშნული შეზღუდვა არ ვრცელდება პირებზე, რომელთა სამუშაო მოვალეობა მოითხოვს სახურავზე ყოფნას, მათ შორის საკვამლე სისტემების გამწმენდებზე.

მუხლი 4.4 — ცხენითა და ეტლით სახიფათო გადაადგილება

აკრძალულია ცხენით, ეტლით ან სხვა სახმელეთო სატრანსპორტო საშუალებით გადაჭარბებული სიჩქარით გადაადგილება ქალაქებში, მთავარ ქუჩებსა და ხალხმრავალ ადგილებში, თუ აღნიშნული საფრთხეს უქმნის მოქალაქეებს.

აღნიშნული ქმედება ისჯება 10 თვით თავისუფლების აღკვეთით.

მუხლი 4.5 — სატრანსპორტო საშუალების უყურადღებოდ დატოვება

აკრძალულია სახმელეთო ან საჰაერო სატრანსპორტო საშუალების, მათ შორის საჰაერო ბუშტის, უყურადღებოდ დატოვება ისეთ ადგილას, სადაც იგი ხელს უშლის მოქალაქეთა თავისუფალ გადაადგილებას ან საფრთხეს უქმნის საზოგადოებრივ უსაფრთხოებას.

აღნიშნული ქმედება ისჯება 10 თვით თავისუფლების აღკვეთით.

მუხლი 4.6 — ნაგვისა და ცხოველის გვამის გადაყრა

აკრძალულია ქალაქის ტერიტორიაზე, განსაკუთრებით მთავარ ქუჩებსა და საზოგადოებრივ ადგილებში, ნაგვის ან ცხოველის გვამის გადაყრა, გარდა სპეციალურად გამოყოფილი ადგილებისა.

აღნიშნული ქმედება ისჯება 5 თვით თავისუფლების აღკვეთით.

მუხლი 4.7 — რელიგიურ წესრიგთან დაკავშირებული დარღვევები

პუნქტი 1.

ნებისმიერი საჯარო საქმიანობა, რომელიც მიზნად ისახავს სატანიზმის გავრცელებას, პრაქტიკას ან წახალისებას, მათ შორის სატანისტური რიტუალების ორგანიზებასა და ჩატარებას, წარმოადგენს დანაშაულს.

სასჯელი: 60 თვით თავისუფლების აღკვეთა.

პუნქტი 2.

საჯარო ქმედება, რომელიც გამოხატავს ქრისტიანული რელიგიური მრწამსის მიმართ მიზანმიმართულ გმობას, დაცინვას ან დამამცირებელი მასალის გავრცელებას და მიზნად ისახავს ქრისტიანთა რელიგიური გრძნობების შელახვას, ისჯება 40 თვით თავისუფლების აღკვეთით.

პუნქტი 3.

პირი, რომელსაც არ გააჩნია შესაბამისი საეკლესიო წოდება ან უფლებამოსილება, მაგრამ საჯაროდ თავს ქრისტიანული ეკლესიის ოფიციალურ წარმომადგენლად ასაღებს, ამ სტატუსით ატარებს კამპანიას ან მოქალაქეებს რელიგიურ სწავლებას სთავაზობს, ისჯება 25 თვით თავისუფლების აღკვეთით.

მუხლი 4.8 — ცხოველების გამოყენება და გაწვრთნა ქალაქის ტერიტორიაზე

აკრძალულია ქალაქის ტერიტორიაზე ფრინველების ან სხვა ცხოველების გაწვრთნა, თუ აღნიშნული საფრთხეს უქმნის საზოგადოებრივ წესრიგს ან მოქალაქეთა უსაფრთხოებას.

აღნიშნული ქმედება ისჯება 10 თვით თავისუფლების აღკვეთით.

ასევე აკრძალულია ცხენის ან სხვა სატრანსპორტო საშუალების განზრახ გამოყენება ადამიანის ან ადამიანთა ჯგუფის დაზიანების მიზნით.

აღნიშნული ქმედება ისჯება 10 თვით თავისუფლების აღკვეთით.

მუხლი 4.9 — საზოგადოებრივი სიმშვიდის დარღვევა ხმაურით

აკრძალულია ხმამაღალი საუბარი, ყვირილი ან სხვა ხმაური, რომელიც:

1. მნიშვნელოვნად აწუხებს საზოგადოებას;

2. არღვევს საზოგადოებრივ სიმშვიდეს;

3. ხელს უშლის სახელმწიფო სამართალდამცავ ორგანოებს სამსახურებრივი ან პროცედურული მოქმედებების განხორციელებაში.

პირველი დარღვევის შემთხვევაში პირს ეძლევა გაფრთხილება.

განმეორებითი დარღვევა ისჯება 5 თვით თავისუფლების აღკვეთით.

გამონაკლისი: აღნიშნული შეზღუდვა არ ვრცელდება სახელმწიფო მოხელეებზე, როდესაც ისინი სამსახურებრივი მოვალეობის შესრულებისას გასცემენ აუცილებელ ბრძანებებს მოქალაქეების ან თანამშრომლების მიმართ.

მუხლი 4.10 — საზოგადოებრივ ადგილებში შესაბამისი ჩაცმულობა

მექსიკის სახელმწიფოს თითოეული მოქალაქე ვალდებულია საზოგადოებრივ ადგილებში დაიცვას მისი სტატუსისა და თანამდებობისთვის შესაბამისი ჩაცმულობის ნორმები.

ჩაცმულობა არ უნდა არღვევდეს საზოგადოებრივ წესრიგს, სახელმწიფო დაწესებულებების მოთხოვნებს ან საჯარო სივრცეში მოქმედ დადგენილ წესებს.

მუხლი 4.11 — საჯარო ღონისძიებების ჩატარება

ქალაქში, რეგიონში ან მექსიკის სახელმწიფოს ტერიტორიაზე საჯარო ღონისძიების ჩატარება შესაძლებელია ელ კომენდანტეს ან მის მიერ უფლებამოსილი სახელმწიფო ორგანოს ნებართვით.

ღონისძიების ორგანიზატორები ვალდებულნი არიან ღონისძიების ჩატარებამდე არაუგვიანეს 2 დღით ადრე წარადგინონ შესაბამისი განაცხადი.

აკრძალულია ისეთი ღონისძიების ორგანიზება ან ჩატარება, რომელმაც შესაძლოა საფრთხე შეუქმნას:

1. საზოგადოებრივ უსაფრთხოებას;

2. საზოგადოებრივ წესრიგს;

3. მოქალაქეთა სიცოცხლეს ან ჯანმრთელობას;

4. სახელმწიფოს სტაბილურობასა და უსაფრთხოებას.

აღნიშნული კანონის დარღვევა ისჯება 20 თვით თავისუფლების აღკვეთით.

მუხლი 4.12 — უნებართვო მსვლელობა და შეკრება

საზოგადოებრივი წესრიგის განზრახ დესტაბილიზაციის მიზნით ორგანიზებული ან ჩატარებული უნებართვო მსვლელობა ისჯება 25 თვით თავისუფლების აღკვეთით.

სასჯელის განსაზღვრისას გათვალისწინებულია ქმედების მასშტაბი, მონაწილეთა რაოდენობა და საზოგადოებრივი უსაფრთხოებისთვის შექმნილი საფრთხე.

მუხლი 4.13 — სექსუალური ხასიათის ქმედება საზოგადოებრივ ადგილას

საზოგადოებრივ ადგილას ისეთი სექსუალური ხასიათის ქმედების ჩადენა, რომელიც არღვევს საზოგადოებრივ წესრიგს და საჯარო სივრცის ნორმებს, აკრძალულია.

აღნიშნული ქმედება ისჯება 30 თვემდე თავისუფლების აღკვეთით.